રિંકુ સિંહે મારી સિક્સર, ખાતામાં જોડાયા 0 રન, જાણો ICCનો આ ચોંકાવનારો નિયમ

ભારતીય ટીમે વર્લ્ડ કપ ફાઇનલમાં હારના દુ:ખને ભૂલીને ઓસ્ટ્રેલિયા સામેની પાંચ મેચની T20 શ્રેણીની શાનદાર જીત સાથે શરૂઆત કરી છે. વિશાખાપટ્ટનમના મેદાન પર રમાયેલી શ્રેણીની પ્રથમ મેચ ટીમ ઈન્ડિયાએ 2 વિકેટે જીતી લીધી હતી. આ મેચમાં ભારતને 209 રનનું મોટુ ટાર્ગેટ મળ્યું હતું.   જે તેણે 19.5 ઓવરમાં મેળવી લીધું.  ટીમ તરફથી કેપ્ટન સૂર્યકુમાર યાદવે 80 રનની શાનદાર ઇનિંગ રમી તો ઇશાન કિશને પણ 58 રનની શાનદાર ઇનિંગ રમી. આ ઉપરાંત  રિંકુ સિંહે 14 બોલમાં 22 રનની અણનમ ઈનિંગ રમીને ટીમને જીત તરફ લઈ જઈને કમબેક કર્યું હતું.  જોકે આ મેચમાં રિંકુએ છેલ્લા બોલ પર સિક્સર ફટકારીને ટીમને જીત અપાવવાનો પ્રયાસ કર્યો પરંતુ આ શોટ તેના ખાતામાં ઉમેરાયો નહોતો.

નો બોલને કારણે સિક્સર ગણવામાં આવી નહોતી 

પ્રથમ T20 મેચમાં ભારતીય ટીમને જીતવા માટે છેલ્લી ઓવરમાં વધુ સાત રન બનાવવાના હતા. રિંકુએ પહેલા જ બોલ પર ચોગ્ગો ફટકારીને ટીમને જીતની નજીક પહોંચાડી દીધું. પરંતુ આ પછી પછીના ચાર બોલમાં માત્ર 2 રન જ બન્યા હતા અને ભારતે પણ ત્રણ વિકેટ ગુમાવી દીધી હતી. જ્યારે છેલ્લા બોલ પર જીતવા માટે માત્ર એક રનની જરૂર હતી ત્યારે રિંકુએ શાનદાર સિક્સર ફટકારી હતી પરંતુ આ બોલ નો બોલ હોવાથી ભારત પહેલા જ મેચ જીતી ચૂક્યું હતું, જેના કારણે આ સિક્સ રિંકુના ખાતામાં ઉમેરાઈ ન હતી. આ કારણે ભારતે આ લક્ષ્યાંક 19.5 ઓવરમાં હાંસલ કરી લીધો હતો. આ મેચમાં સુકાની સૂર્યકુમાર યાદવે પણ મેચ બાદ રિંકુની શાનદાર ઇનિંગની પ્રશંસા કરી હતી અને કહ્યું હતું કે તે આ સ્થિતિમાં ખુદને શાંત રાખ્યું હતું.

સૂર્યકુમાર અને ઈશાને નાખ્યો જીતનો પાયો 

આ મેચમાં જ્યારે ભારતીય ટીમ ટાર્ગેટનો પીછો કરવા ઉતરી ત્યારે બંને ઓપનિંગ બેટ્સમેન 22 રનના સ્કોર સુધી પેવેલિયન પરત ફર્યા હતા. આ પછી ઈશાન કિશને કેપ્ટન સૂર્યકુમાર યાદવ સાથે મળીને ત્રીજી વિકેટ માટે 60 બોલમાં 112 રનની ભાગીદારી કરી અને ટીમને જીત તરફ લઈ ગઈ. ઈશાનના આઉટ થયા બાદ કેપ્ટન સૂર્યાને રિંકુ સિંહનો સાથ મળ્યો અને બંને વચ્ચે પાંચમી વિકેટ માટે 17 બોલમાં 40 રનની ભાગીદારીએ આ મેચમાં ભારતની જીતને સંપૂર્ણપણે સુનિશ્ચિત કરી દીધી. હવે બંને ટીમો વચ્ચે આ T20 શ્રેણીની બીજી મેચ 26 નવેમ્બરે તિરુવનંતપુરમના મેદાન પર રમાશે.