શુ તમે X પર જોઈ PM મોદીની નવી DP? જવાનોની વીરતાને કરી છે સલામ

PM MODI DP ON X

આજે 7 મેના રોજ પાકિસ્તાન વિરુદ્ધના 'ઓપરેશન સિંદૂર'ને એક વર્ષ પૂર્ણ થયું છે. આ ઐતિહાસિક મિશનની સફળતાની ઉજવણી કરવા અને જવાનોની વીરતાને સન્માન આપવા માટે પ્રધાનમંત્રી નરેન્દ્ર મોદીએ સોશિયલ મીડિયા પ્લેટફોર્મ X પર પોતાનો પ્રોફાઈલ પિક્ચર (DP) બદલ્યો છે. પીએમ મોદીએ નવી તસવીરમાં ઓપરેશન સિંદૂરનો લોગો અને તેની ઉપર લહેરાતા ત્રિરંગાને સ્થાન આપીને ભારતીય સેનાની બહાદુરીને સલામ કરી છે.

પહેલગામ હુમલાનો બદલો અને આતંકવાદનો સફાયો

ભારત માટે 7 મેની તારીખ અત્યંત ગૌરવશાળી છે. એક વર્ષ પહેલા આ જ દિવસે ભારતે પહેલગામમાં થયેલા આતંકવાદી હુમલાનો જડબાતોડ જવાબ આપવા માટે પાકિસ્તાનમાં સક્રિય આતંકવાદી અડ્ડાઓ પર પ્રહારો કર્યા હતા. ભારત સરકાર દ્વારા આ સૈન્ય કાર્યવાહીને 'ઓપરેશન સિંદૂર' નામ આપવામાં આવ્યું હતું. ભારતીય સશસ્ત્ર દળોએ માત્ર ત્રણ દિવસમાં આક્રમક કાર્યવાહી કરીને પાકિસ્તાનને ઘૂંટણિયે પડવા મજબૂર કરી દીધું હતું.

પીએમ મોદીએ જવાનોની હિંમત અને સંકલ્પને બિરદાવ્યો

આ ખાસ પ્રસંગે પ્રધાનમંત્રીએ સશસ્ત્ર દળોની અજોડ હિંમત અને ચોકસાઈની પ્રશંસા કરી હતી. તેમણે કહ્યું કે એક વર્ષ પહેલા આપણા જવાનોએ જે દૃઢ નિશ્ચય બતાવ્યો હતો, તેણે નિર્દોષ ભારતીયો પર હુમલો કરનારાઓને યોગ્ય પાઠ ભણાવ્યો છે. પીએમ મોદીએ વધુમાં જણાવ્યું કે ઓપરેશન સિંદૂર એ આતંકવાદ સામે ભારતના દૃઢ પ્રતિભાવ અને રાષ્ટ્રીય સુરક્ષા માટેની અતૂટ પ્રતિબદ્ધતાનું જીવંત પ્રતીક છે.

સંરક્ષણ ક્ષેત્રમાં આત્મનિર્ભરતા અને સંકલનનું ઉદાહરણ

પ્રધાનમંત્રીએ આ મિશનને ભારતની સૈન્ય તાકાત અને આધુનિક તૈયારીઓનું પ્રદર્શન ગણાવ્યું હતું. તેમણે કહ્યું કે આ ઓપરેશન વિવિધ સૈન્ય પાંખો વચ્ચેના સીમલેસ સંકલન અને સંરક્ષણ ક્ષેત્રે ભારતની વધતી જતી આત્મનિર્ભરતાને ઉજાગર કરે છે. આજે એક વર્ષ પછી પણ ભારત આતંકવાદના સમર્થન તંત્રને તોડી પાડવા અને દેશની સુરક્ષા કરવાના પોતાના સંકલ્પમાં એટલું જ અડગ અને મજબૂત છે.

સંરક્ષણ મંત્રી રાજનાથ સિંહે સેનાના બલિદાનને સલામ કરી

આ વર્ષગાંઠ પર સંરક્ષણ મંત્રી રાજનાથ સિંહે પણ સશસ્ત્ર દળોની બહાદુરીને બિરદાવી હતી. તેમણે જણાવ્યું હતું કે ઓપરેશન દરમિયાન સેનાએ જે ચોકસાઈ અને સંકલન દર્શાવ્યું હતું તે આધુનિક લશ્કરી કામગીરી માટે એક નવું ઉદાહરણ છે. આ મિશન સાબિત કરે છે કે જ્યારે પણ રાષ્ટ્રની સુરક્ષા પર જોખમ આવશે, ત્યારે આપણા જવાનો નિર્ણાયક અને મજબૂત પગલાં લેવા માટે હંમેશા સજ્જ છે.

ગૃહમંત્રી અમિત શાહનો દુશ્મનોને કડક સંદેશ

ગૃહમંત્રી અમિત શાહે ઓપરેશન સિંદૂરને એક ઐતિહાસિક મિશન ગણાવતા દુશ્મનોને ચેતવણી આપી હતી. તેમણે કહ્યું કે આ દિવસ દુશ્મનોને યાદ અપાવશે કે તેઓ ગમે ત્યાં છુપાય, પણ ભારતની ફાયરપાવર અને મજબૂત રાજકીય ઈચ્છાશક્તિથી બચી શકશે નહીં. ગુપ્તચર એજન્સીઓની સચોટ માહિતી અને સેનાની તાકાતે આતંક ફેલાવનારાઓને જે રીતે હરાવ્યા છે, તે ભારતની અજેય શક્તિનો પુરાવો છે.