IPS જી. એસ. મલિક: અમિત શાહના ખાસ અને ગુજરાતના DGP બનવા પાછળ જાણો તેમના દમદાર કાર્યો વિષે

Written By: વેબદુનિયા ન્યુઝ ટીમ

Updated: Mon, 8 Jun 2026 (23:34 IST)

GS MALIK

IPS અધિકારી જ્ઞાનેન્દ્ર સિંહ મલિકે (GS મલિક) ગાંધીનગરમાં રાજ્યના પોલીસ મહાનિર્દેશક (DGP) તરીકેનો કાર્યભાર સંભાળી લીધો છે. મૂળ હરિયાણાના અને 1992 બેચના આ ફિટ અને સક્રિય અધિકારી લાંબા સમય સુધી આ પદ પર સેવા આપશે. અગાઉ ઇન્ચાર્જ DGP તરીકે ફરજ બજાવતા 1991 બેચના અધિકારી ડૉ. KLN રાવને સુપરસીડ કરીને સરકારે જી. એસ. મલિકને આ મોટી જવાબદારી સોંપી છે.

'મિશન ફીટ ખાકી' અને ચંડોળા તળાવનું મોટું બુલડોઝર ઓપરેશન

અમદાવાદ પોલીસ કમિશનર (CP) તરીકે ફરજ બજાવતા જી. એસ. મલિકે પોલીસ દળ માટે "મિશન ફીટ ખાકી" ની શરૂઆત કરી હતી, જેનું તેઓ વ્યક્તિગત નિરીક્ષણ કરતા હતા. ગયા વર્ષે જ્યારે તેમણે અમદાવાદમાં ગેરકાયદેસર બાંગ્લાદેશી ઇમિગ્રન્ટ્સના ગઢ ગણાતા ચંડોળા તળાવ વિસ્તારને સાફ કરવા માટે ગુજરાતના સૌથી મોટા બુલડોઝર ઓપરેશનનું નેતૃત્વ કર્યું, ત્યારે તેઓ દેશભરમાં ભારે ચર્ચામાં આવ્યા હતા.

નેતા છોટુ વસાવાની ધરપકડ કરાવી સ્થાપી પ્રામાણિકતાની છાપ

હરિયાણાના જાટ સમુદાયમાંથી આવતા જી. એસ. મલિક એક કડક અને નિર્ભય અધિકારી તરીકે ઓળખાય છે. તેમણે પોતાની પોલીસ કારકિર્દીની શરૂઆત ભુજથી કરી હતી. ભરૂચના એસપી (SP) તરીકેના તેમના કાર્યકાળ દરમિયાન, તેમણે ભારે હિંમત બતાવીને એક મહિલા સ્પેશિયલ ઓફિસર મીની જોસેફને તે સમયના શક્તિશાળી આદિવાસી નેતા અને ધારાસભ્ય છોટુ વસાવાની ધરપકડ કરવા માટે મોકલ્યા હતા, જેનાથી આખો રાજકીય માહોલ ગરમાયો હતો.

પોરબંદરમાં 'ગોડમધર' સંતોખબેન જાડેજા સામે લીધા કડક પગલાં

જ્યારે જી. એસ. મલિકની બદલી પોરબંદરમાં થઈ, ત્યારે તેમણે ત્યાં કાયદો અને વ્યવસ્થા મજબૂત કરવા માટે લેડી ડોન સંતોખબેન જાડેજા સામે કડક વલણ અપનાવ્યું હતું. મલિકના દબાણને કારણે સંતોખબેન જાડેજાએ પોરબંદર છોડીને રાજકોટ સ્થળાંતરિત થવું પડ્યું હતું. ઉલ્લેખનીય છે કે, પાછળથી બોલીવુડમાં બનેલી પ્રખ્યાત ફિલ્મ "ગોડમધર" સંતોખબેન જાડેજાના જીવન પર જ આધારિત હતી.

અમદાવાદમાં કાયદો-વ્યવસ્થાની જાળવણી અને વીઆઈપી ઈવેન્ટ્સનું સફળ સંચાલન

અમદાવાદ સીપી તરીકે તેમણે શહેરમાં કોઈ મોટી ગુનાહિત ઘટનાઓ થવા દીધી નહોતી. નરેન્દ્ર મોદી સ્ટેડિયમમાં યોજાયેલી આઈપીએલ (IPL), વર્લ્ડ કપની મોટી મેચો અને કોલ્ડ પ્લે (Coldplay) જેવા ભવ્ય આંતરરાષ્ટ્રીય કાર્યક્રમો દરમિયાન સુરક્ષા વ્યવસ્થાને તેમણે ખૂબ જ સફળતાપૂર્વક સંભાળી હતી. આ ઉપરાંત, વિમાન દુર્ઘટના જેવી કટોકટીની સ્થિતિમાં પણ તેમના નેતૃત્વ હેઠળ અમદાવાદ પોલીસે પ્રશંસનીય કામગીરી કરી હતી.

કેમ છે અમિત શાહના ખાસ? હરામી નાળાને બનાવ્યું 'અભેદ્ય'

કેન્દ્રીય પ્રતિનિયુક્તિ દરમિયાન જી. એસ. મલિકે BSF અને CRPF માં મહત્વની સેવાઓ આપી હતી. તેમણે પાકિસ્તાન સરહદે આવેલા અત્યંત સંવેદનશીલ 'હરામી નાળા' વિસ્તારમાં મજબૂત સુરક્ષા અને દેખરેખનો પાયો નાખ્યો હતો. તાજેતરમાં જ ગૃહમંત્રી અમિત શાહે પણ આ વિસ્તારની મુલાકાત વખતે કહ્યું હતું કે હરામી નાળા અને સર ક્રીક હવે સંવેદનશીલ નહીં પણ 'અભેદ્ય' બન્યા છે. યુએન પીસકીપિંગ ફોર્સમાં કામ કરી ચૂકેલા મલિક પર અમિત શાહને અતૂટ ભરોસો છે અને તેઓ આગામી સમયમાં ગુજરાતની સરહદ સુરક્ષા અને કાયદો-વ્યવસ્થા વધુ કડક બનાવશે.