Khel Mahakumbh 2026: વડોદરાથી 'ખેલ મહાકુંભ 2026'નો ભવ્ય પ્રારંભ: CM ભૂપેન્દ્ર પટેલ અને હર્ષ સંઘવીએ કરાવી શરૂઆત
khel mahakumbh
ગુજરાતમાં રમતગમત ક્ષેત્રને નવી ઊંચાઈએ પહોંચાડવાના ઉદ્દેશ્ય સાથે વડોદરા શહેરથી રાજ્યવ્યાપી 'ખેલ મહાકુંભ 2026'નો ભવ્ય પ્રારંભ કરવામાં આવ્યો છે. મુખ્યમંત્રી ભૂપેન્દ્રભાઈ પટેલ અને નાયબ મુખ્યમંત્રી હર્ષભાઈ સંઘવીની વિશેષ ઉપસ્થિતિમાં આ રમતોત્સવનું ઉદ્ઘાટન થયું હતું. આ વર્ષે ખેલ મહાકુંભમાં કુલ 39 જેટલી વિવિધ રમતોનું આયોજન કરવામાં આવ્યું છે, જેમાં દિવ્યાંગ ખેલાડીઓ માટે પણ અલગથી સ્પર્ધાઓ યોજાશે. રમતગમતના આ મહાકુંભમાં આ વર્ષે રેકોર્ડબ્રેક 76.2 લાખથી વધુ ખેલાડીઓએ પોતાનું રજિસ્ટ્રેશન કરાવ્યું છે.
PM નરેન્દ્ર મોદીના વિઝનનું પરિણામ છે ખેલ મહાકુંભ: CM ભૂપેન્દ્ર પટેલ
સમારંભને સંબોધતા મુખ્યમંત્રી ભૂપેન્દ્રભાઈ પટેલે જણાવ્યું હતું કે, ખેલ મહાકુંભ એ વડાપ્રધાન નરેન્દ્ર મોદીના દૂરંદેશી વિઝનનું પરિણામ છે. તેમણે ઉમેર્યું કે આ મહાકુંભના માધ્યમથી ગુજરાતના નાના-મોટા રમતવીરોને પોતાની છુપાયેલી પ્રતિભા દેશ અને દુનિયા સામે દર્શાવવા માટે એક શ્રેષ્ઠ પ્લેટફોર્મ મળ્યું છે. 'રમશે ગુજરાત, જીતશે ગુજરાત'નો મંત્ર આજે રાજ્યના પ્રત્યેક ખેલાડી માટે પ્રેરણાનો સ્ત્રોત બન્યો છે. સરકાર ખેલાડીઓને આધુનિક રમતોના સાધનો અને સુવિધાઓ પૂરી પાડવા માટે પ્રતિબદ્ધ છે.
ભાગીદારીમાં ઐતિહાસિક વધારો: 16 લાખથી વધીને 76 લાખ ખેલાડીઓ નોંધાયા
મુખ્યમંત્રીએ ખેલ મહાકુંભની સફળતા અને તેમાં વધી રહેલી ભાગીદારી અંગે ખુશી વ્યક્ત કરી હતી. શરૂઆતના વર્ષોમાં આ સ્પર્ધામાં આશરે 16 લાખ ખેલાડીઓ જોડાતા હતા, જ્યારે આજે આ સંખ્યા વધીને 76 લાખને પાર પહોંચી ગઈ છે. ખાસ કરીને મહિલા ખેલાડીઓની ભાગીદારીમાં નોંધપાત્ર ઉછાળો આવ્યો છે. રાજ્યની દિકરીઓએ એશિયન ગેમ્સ જેવી આંતરરાષ્ટ્રીય સ્પર્ધાઓમાં ઉત્કૃષ્ટ પ્રદર્શન કરીને ગુજરાતનું નામ રોશન કર્યું છે, તેમજ ખેલો ઈન્ડિયા હેઠળ 410થી વધુ ખેલાડીઓ તૈયાર થઈ રહ્યા છે.
ખેલાડીઓની તાલીમ માટે ખર્ચ ચાર ગણો વધારાશે: નાયબ CM હર્ષભાઈ સંઘવી
નાયબ મુખ્યમંત્રી હર્ષભાઈ સંઘવીએ ખેલાડીઓનો ઉત્સાહ વધારતા મહત્વની જાહેરાતો કરી હતી. તેમણે કહ્યું કે વર્ષ 2010થી શરૂ થયેલી આ યાત્રા આજે ગ્રામીણ અને શહેરી ક્ષેત્રોના ખૂણે-ખૂણે પહોંચી ગઈ છે. આજે ઘણા દેશોની કુલ વસતી કરતાં પણ વધુ ખેલાડીઓએ ખેલ મહાકુંભમાં નામ નોંધાવ્યા છે. યુવા રમતવીરોને વૈશ્વિક કક્ષાનું કૌશલ્ય મળી રહે તે માટે સરકાર દ્વારા ખેલાડીઓની સ્પેશિયલ તાલીમ અને ટ્રેનિંગ પાછળ કરવામાં આવતો ખર્ચ ચાર ગણો વધારવામાં આવશે.
2030 કોમનવેલ્થ ગેમ્સની યજમાની માટે ગુજરાત સજ્જ
હર્ષભાઈ સંઘવીએ વધુમાં ભારપૂર્વક જણાવ્યું કે વર્ષ 2030માં યોજાનારી 'કોમનવેલ્થ ગેમ્સ'નું આયોજન કરવાનો ઐતિહાસિક અવસર ગુજરાતને મળ્યો છે. અમદાવાદને આ આંતરરાષ્ટ્રીય રમતગમતના મહાકુંભની યજમાની સત્તાવાર રીતે સોંપવામાં આવી છે. એશિયન ગેમ્સમાં પણ ગુજરાતના બે ખેલાડીઓએ મેડલ મેળવીને રાજ્યની શાન વધારી છે. ખેલ મહાકુંભમાંથી શોધાયેલા અનેક ખેલાડીઓ આજે રાષ્ટ્રીય અને આંતરરાષ્ટ્રીય સ્તરે વિવિધ રમતોમાં સફળતા મેળવી રહ્યા છે.
'વી વિલ ડુ ઈટ'ના મંત્ર સાથે રમતગમત ક્ષેત્રે નવી ક્રાંતિ
કાર્યક્રમના અંતે મુખ્યમંત્રી ભૂપેન્દ્રભાઈ પટેલે વિકસિત ભારત અને વિકસિત ગુજરાતના નિર્માણ માટે 'વી વિલ ડુ ઈટ' (We Will Do It) નો પ્રેરણાદાયી મંત્ર આપ્યો હતો. નાયબ મુખ્યમંત્રી હર્ષભાઈ સંઘવીએ ખેલ મહાકુંભમાં ભાગ લેનારા તમામ યુવાનો અને સ્પર્ધકોને શુભકામનાઓ પાઠવી હતી. રાજ્ય સરકારનો મુખ્ય ઉદ્દેશ્ય રાજ્યના અંતરિયાળ વિસ્તારોમાં છુપાયેલી રમતગમતની ક્ષમતાઓને બહાર લાવીને ખેલાડીઓને રાષ્ટ્રીય અને આંતરરાષ્ટ્રીય મંચ સુધી પહોંચાડવાનો છે.
