એકતાનગર ખાતે રાષ્ટ્રીય એકતા દિવસની ભવ્ય ઉજવણી: વડાપ્રધાન મોદીએ સરદાર પટેલને અર્પી શ્રદ્ધાંજલિ, રૂ. 400 કરોડના વિકાસકાર્યોની ભેટ
modi
સરદાર વલ્લભભાઈ પટેલની 151મી જન્મજયંતી પ્રસંગે આજે શનિવારે ગુજરાતના એકતાનગર (કેવડિયા) ખાતે રાષ્ટ્રીય એકતા દિવસની ભવ્ય ઉજવણી થઈ રહી છે. આ ખાસ અવસરે વડાપ્રધાન નરેન્દ્ર મોદી ગુજરાતની મુલાકાતે આવી પહોંચ્યા છે. તેમણે દિવસભર વિવિધ કાર્યક્રમોમાં હાજરી આપી સરદાર પટેલને શ્રદ્ધાંજલિ અર્પવાની સાથે રાજ્યને રૂ. 400 કરોડથી વધુના વિકાસકામોની ભેટ ધરી છે.
સ્ટેચ્યૂ ઑફ યુનિટી ખાતે પુષ્પાંજલિ અને હેલિકોપ્ટરથી પુષ્પવર્ષા
વડાપ્રધાન મોદીએ સવારે વિશ્વપ્રસિદ્ધ 'સ્ટેચ્યૂ ઑફ યુનિટી' ખાતે પહોંચી સરદાર વલ્લભભાઈ પટેલની પ્રતિમાને ભાવપૂર્વક પુષ્પાંજલિ અર્પણ કરી હતી. આ દરમિયાન ભારતીય વાયુસેનાના બે હેલિકોપ્ટર દ્વારા સરદાર પટેલની વિરાટ પ્રતિમા પર આકાશમાંથી પુષ્પવર્ષા કરવામાં આવી હતી. આ દ્રશ્ય દેશની એકતા અને અખંડિતતાના પ્રતીક સમાન સરદાર સાહેબ પ્રત્યેનો અાદર વ્યક્ત કરતું હતું.
રૂ. 400 કરોડના વિકાસપ્રકલ્પોનું લોકાર્પણ અને મુલાકાત
શ્રદ્ધાંજલિ બાદ વડાપ્રધાને એકતાનગર વિસ્તારમાં રૂ. 400 કરોડથી વધુના વિવિધ વિકાસલક્ષી પ્રોજેક્ટ્સનું લોકાર્પણ અને ખાતમુહૂર્ત કર્યું હતું. આ વિકાસકાર્યોથી વિસ્તારમાં પ્રવાસન અને મૂળભૂત સુવિધાઓને મોટો વેગ મળશે. આ સાથે જ તેમણે અહીં વિકસાવવામાં આવેલા 'રેન ફોરેસ્ટ' અને 'વામન વૃક્ષ વાટિકા'ની મુલાકાત લઈને પ્રાકૃતિક સુવિધાઓનું પ્રત્યક્ષ નિરીક્ષણ કર્યું હતું.
વામન વૃક્ષ વાટિકા અને બોંસાઈ કલેક્શનની સરાહના
વામન વૃક્ષ વાટિકાની મુલાકાત દરમિયાન વડાપ્રધાન મોદીએ બોંસાઈના સુંદર સંગ્રહ અને થીમ આધારિત બગીચાની પ્રશંસા કરી હતી. તેમણે સોશિયલ મીડિયા પર પોસ્ટ કરીને જણાવ્યું કે આ સ્થળ પ્રકૃતિની સુંદરતા અને સર્જનાત્મકતાને નજીકથી જાણવાની શ્રેષ્ઠ તક આપે છે. અહીં પ્રવાસીઓ માટે 'મેક યોર ઓન બોંસાઈ'નો અનોખો અનુભવ પણ ઉપલબ્ધ કરાવવામાં આવ્યો છે.
A fascinating world of bonsais in Kevadia. Enjoyed visiting Vaman Vriksh Vatika in Ekta Nagar. With its beautiful bonsai collection, themed gardens and serene surroundings, this is a wonderful place to appreciate the beauty and creativity of nature. What makes it even more special is the ‘Make Your Own Bonsai’ experience for visitors.
— Narendra Modi (@narendramodi) October 31, 2026
સાંજે રાષ્ટ્રીય એકતા પરેડ અને ભવ્ય આકર્ષણો
સાંજે 5:00 વાગ્યાથી એકતાનગરમાં રાષ્ટ્રીય એકતા પરેડનો પ્રારંભ થયો હતો. વડાપ્રધાન મોદી સાંજે 5:30થી 7:40 વાગ્યા સુધી આ પરેડમાં વિશેષ રૂપે ઉપસ્થિત રહ્યા હતા. આ વર્ષની પરેડને વધુ ભવ્ય બનાવવામાં આવી છે, જેમાં દેશની સુરક્ષા અને અખંડિતતાના દર્શન કરાવતા 15 વિવિધ ટેબ્લો તેમજ 5,000 જેટલા કલાકારો દ્વારા સાંસ્કૃતિક કાર્યક્રમો રજૂ કરવામાં આવ્યા છે.
#WATCH | Prime Minister Narendra Modi participates in Rashtriya Ekta Diwas celebrations, commemorating the 151st birth anniversary of Sardar Vallabhbhai Patel at Parade Ground, Ekta Nagar, Gujarat (Source: DD) https://t.co/TSULWmQ4wR
— ANI (@ANI) October 31, 2026
વડાપ્રધાનનો દિલ્હી પરત ફરવાનો કાર્યક્રમ
એકતાનગર ખાતેના તમામ કાર્યક્રમો પૂર્ણ કર્યા બાદ વડાપ્રધાન મોદી રાત્રે 8:00 વાગ્યે વડોદરા એરપોર્ટ જવા રવાના થશે. ત્યારબાદ તેઓ રાત્રે 9:10 વાગ્યે વડોદરાથી દિલ્હી જવા માટે વિમાન મારફતે પ્રસ્થાન કરશે. આ સમગ્ર પ્રવાસ રાષ્ટ્રીય એકતા અને વિકાસના સંકલ્પને વધુ મજબૂત કરવાનો રહ્યો છે.
