રાજ્યમાં આજથી વિધિવત્ ચોમાસું- 30 તારીખ સુધી ગુજરાતમાં ભારે વરસાદની આગાહી
ગુજરાત માટે ચોમાસા વિશેના સારા સમાચાર છે. હવામાન ખાતાની હાલની માહિતી મુજબ ભારતમાં દક્ષિણ-પશ્ચિમ ચોમાસુ મધ્ય અને ઉત્તરના કેટલાક વિસ્તારોમાં આગળ વધ્યું છે.
તેમાં મહારાષ્ટ્રના બાકી બચેલા ભાગો જેમાં મુંબઈનો સમાવેશ થાય છે, ત્યારબાદ મધ્ય પ્રદેશ અને ઉત્તર પ્રદેશ, દિલ્હી, ગુજરાતના અમુક ભાગો, રાજસ્થાન, હરિયાણા, ઉત્તરાખંડના બાકીના ભાગો અને હિમાચલ પ્રદેશના મોટાભાગો તથા જમ્મુ-કાશ્મીરના અમુક ભાગો અને લદ્દાખમાં 25 જૂને ચોમાસું આગળ વધ્યું છે.
હવામાન વિભાગના મતે મુંબઈમાં ચોમાસું પહોંચે ત્યાર બાદ એક કે બે દિવસના ગાળામાં ચોમાસું સત્તાવાર રીતે ગુજરાતમાં પહોંચી જતું હોય છે.
હવામાન વિભાગની જાહેરાત અનુસાર આવનારા 48 કલાકમાં ગુજરાતના વધારે ભાગોમાં ચોમાસું પહોંચે તેવી અનુકૂળ પરિસ્થિતિઓ સર્જાયેલી જોવા મળે છે.
સૌથી પહેલાં રાજ્યના દક્ષિણ ગુજરાતના વિસ્તારો વલસાડ, નવસારી સહિતના વિસ્તારોમાં ચોમાસું પહોંચે છે.
ત્યારબાદ બેથી ચાર દિવસમાં સૌરાષ્ટ્ર અને ઉત્તર ગુજરાતના મોટાભાગના વિસ્તારોમાં પહોંચી જતું હોય છે.
