AUS vs SL: અમ્પાયરના નિર્ણયથી ડેવિડ વોર્નરને આવ્યો ગુસ્સો, પેવેલિયન પરત ફરતી વખતે બોલ્યા અપશબ્દ, જુઓ વીડિયો

Publish: Tue, 17 Oct 2023 (11:09 IST) Updated: Tue, 17 Oct 2023 (11:13 IST)

David Warner

ઓસ્ટ્રેલિયા અને શ્રીલંકા વચ્ચે વનડે વર્લ્ડ કપની 14મી મેચ લખનૌના મેદાન પર રમાઈ હતી. આ મેચમાં ઓસ્ટ્રેલિયન ટીમના બોલરોનું શાનદાર પ્રદર્શન જોવા મળ્યું જેણે શ્રીલંકાની ઇનિંગ્સને માત્ર 209 રન પર જ સિમિત કરી દીધી. જોકે આ લક્ષ્યાંક હાંસલ કરવા ઓસ્ટ્રેલિયાએ 5 વિકેટ ગુમાવી દીધી હતી. દરમિયાન, ઓપનિંગ બેટ્સમેન ડેવિડ વોર્નર તેને એલબીડબલ્યુ આઉટ કરવાના નિર્ણય પર ભારે ગુસ્સો દર્શાવતો જોવા મળ્યો હતો, જેમાં તેણે અમ્પાયર સાથે દુર્વ્યવહાર પણ કર્યો હતો.

pic.twitter.com/C9urLZ57Pm

— IndiaCricket (@IndiaCrick18158) October 16, 2023

જ્યારે ઓસ્ટ્રેલિયન ટીમ શ્રીલંકા સામે 210 રનના સ્કોરનો પીછો કરવા ઉતરી ત્યારે 11 રનના અંગત સ્કોર પર રમી રહેલા વોર્નરને ચોથી ઓવરમાં દિલશાન મદુશંકાના હાથે એલબીડબ્લ્યુ આઉટ કરવામાં આવ્યો હતો. ડેવિડ વોર્નરે અમ્પાયર જોએલ વિલ્સનના નિર્ણયને પડકારવા માટે DRS લેવાનો નિર્ણય કર્યો. જો કે, જ્યારે રિવ્યુમાં તપાસ કરવામાં આવી તો બોલ વિકેટને સ્પર્શી રહ્યો હતો, આવી સ્થિતિમાં મેદાન પરના અમ્પાયરના નિર્ણયને સ્વીકારવામાં આવ્યો અને વોર્નરને પેવેલિયન પરત ફરવું પડ્યું. DRSનો નિર્ણય આવતાની સાથે જ વોર્નરનો ગુસ્સો મેદાન પર જ જોવા મળ્યો હતો, જેમાં તેણે પહેલા પોતાનું બેટ પેડ પર જોરથી પછાડ્યું હતું. આ પછી પેવેલિયનમાં જતા સમયે તેણે અમ્પાયર તરફ જોઈને કેટલાક અપશબ્દોનો પણ ઉપયોગ કર્યો હતો.

અમ્પાયરના નિર્ણય પર નારાજગી વ્યક્ત કરવા બદલ ડેવિડ વોર્નરને પણ કાર્યવાહીનો સામનો કરવો પડી શકે છે, જેમાં તેની મેચ ફી કાપવામાં આવી શકે છે.

અત્યાર સુધી ત્રણ મેચમાં બનાવ્યા માત્ર 65 રન  

ODI વર્લ્ડ કપ 2023માં ડેવિડ વોર્નરે અત્યાર સુધીની ત્રણ મેચોમાં બેટથી અપેક્ષા મુજબનું પ્રદર્શન કર્યું નથી. વોર્નર 21.66ની એવરેજથી માત્ર 65 રન જ બનાવી શક્યો છે અને આ સમયગાળા દરમિયાન તેનો સર્વોચ્ચ સ્કોર 41 રન રહ્યો છે. વોર્નર સિવાય સ્ટીવ સ્મિથનું પણ આવું જ પ્રદર્શન જોવા મળ્યું જેણે અત્યાર સુધી 3 મેચમાં 65 રન બનાવ્યા છે.