ગુજરાત વિધાનસભાની 182 બેઠકોમાંથી ખેડબ્રહ્મા એસટી અનામત વિધાનસભા બેઠક એવી છે કે ત્રણ દાયકા કરતાં વધુ સમયથી કોંગ્રેસ પક્ષ સતત તેના પર કબજો જમાવી રહ્યો છે. કોંગ્રેસ પક્ષના કોટવાલ અશ્વિનભાઈ લક્ષ્મણભાઈએ 2017ની ચૂંટણીમાં ભાજપને હરાવીને અહીં જીતની હેટ્રિક ફટકારી હતી. ફરી એકવાર ભાજપ અને કોંગ્રેસ વચ્ચે જોરદાર ટક્કર થવા જઈ રહી છે. આ સાથે આમ આદમી પાર્ટી પણ ચૂંટણી મેદાનમાં ઉતરી છે, જેના કારણે હરીફાઈ ત્રિકોણીય થવાના અણસાર છે.
આ સીટ પરથી આમ આદમી પાર્ટીએ વિપિન ગામેતીને મેદાનમાં ઉતાર્યા છે. વિપિન ગામેતી પાર્ટીના બિરસા મુંડા મોરચાના વડા પણ છે. ખાસ વાત એ છે કે આ ચૂંટણીમાં આમ આદમી પાર્ટીએ ભારતીય ટ્રાઈબલ પાર્ટી સાથે ગઠબંધન કર્યું છે, જેની પાસે 2 ધારાસભ્યો પણ છે.
સાબરકાંઠા જિલ્લાની ખેડબ્રહ્મા એસટી અનામત વિધાનસભા બેઠક અને સંસદીય લોકસભાની વર્ષ 2017ની ચૂંટણી કોંગ્રેસની તરફેણમાં રહી હતી. આ બેઠક પર કોંગ્રેસના કોટવાલ અશ્વિનભાઈ લક્ષ્મણભાઈએ ભાજપને 11,131 મતોની સરસાઈથી હરાવીને સતત ત્રીજી વખત જીત મેળવી હતી. કોંગ્રેસના કોટવાલ અશ્વિનભાઈને 85,916 મત મળ્યા જ્યારે ભાજપના રમીલાબેન બારાને માત્ર 74,785 મત મળ્યા હતા.
અગાઉ અશ્વિન કોટવાલે 2012માં ભાજપના મકવાણા ભોજાભાઈ હુજાભાઈ અને 2007માં બારા રમીલાબેન બેચરભાઈને હરાવ્યા હતા. કોંગ્રેસના અમરસિંહ ભીલાભાઈ ચૌધરીએ 2002, 1998 અને 1995માં સતત ચૂંટણી જીતી હતી. પરંતુ 1990ની ચૂંટણીમાં ભાજપના બારા બેચરભાઈ ખાતુજીએ કોંગ્રેસના ડામોર જગદીશચંદ્રજી દોલજીભાઈને 8,426 મતોથી હરાવીને જીત મેળવી હતી. સાથે જ 1985 અને 1980ની ચૂંટણીમાં પણ કોંગ્રેસનું વર્ચસ્વ જળવાઈ રહ્યું હતું. કોંગ્રેસ પાર્ટીએ 1980, 1985, 1995, 1998, 2002, 2007, 2012 અને 2017માં ચૂંટણી જીતી છે. 1962ની ચૂંટણીમાં પણ કોંગ્રેસના ડાભી માલજીભાઈ સગરામભાઈ જીત્યા હતા.
ખેડબ્રહ્મા વિધાનસભામાં મતદારોની સંખ્યા 2.82 લાખથી વધુ
ખેડબ્રહ્મા (ST) વિધાનસભા મતવિસ્તારમાં કુલ મતદારોની સંખ્યા 282875 છે. જેમાં 144691 પુરૂષ અને 138179 મહિલા મતદારો છે. આ બેઠક પર અન્ય 5 મતદારો પણ છે. જો ગુજરાતમાં કુલ મતદારોની સંખ્યા જોઈએ તો તે 4,90,89,765 છે. તેમાંથી 2,53,36,610 પુરૂષ, 2,37,51,738 મહિલા અને 1,417 ટ્રાન્સજેન્ડર મતદારો છે. આ વખતે પણ કુલ 27,943 સેવા મતદારો છે. આ સાથે આ વખતે કુલ મતદારો 4,91,17,308 છે.
સાબરકાંઠા લોકસભા બેઠક પર ભાજપે લગાવી જીતની હેટ્રિક
ખેડબ્રહ્મા (ST) વિધાનસભા મત વિસ્તાર ગુજરાતની સાબરકાંઠા લોકસભા બેઠક હેઠળ આવે છે. આ સંસદીય સીટ પર 2009થી ભાજપનો કબજો છે. 2019ની સામાન્ય ચૂંટણીમાં પણ ભાજપના દીપસિંહ રાઠોડનો વિજય થયો હતો. તેમને 701984 મત મળ્યા, જ્યારે કોંગ્રેસના રાજેન્દ્રસિંહ ઠાકોર 4,67,750 મતો સાથે બીજા ક્રમે રહ્યા. 2014ની લોકસભા ચૂંટણીમાં પણ ભાજપના દીપસિંહ રાઠોડે કોંગ્રેસના શંકરસિંહ વાઘેલાને હરાવીને જીત મેળવી હતી. વર્ષ 2009ની ચૂંટણી પણ ભાજપના મહેન્દ્રસિંહ ચૌહાણની તરફેણમાં હતી. આ બેઠક પર ભાજપે જીતની હેટ્રિક લગાવી છે.
