હવામાન વિભાગની મોટી આગાહી: આજે ઉત્તર ગુજરાતથી શરૂ થશે વરસાદ, જાણો 1 જૂને ક્યાં-ક્યાં પડશે?

Publish: Sat, 30 May 2026 (08:55 IST) Updated: Sat, 30 May 2026 (08:57 IST)

રાજ્યમાં પડી રહેલી અસહ્ય ગરમીની વચ્ચે હવે હવામાન બદલાવાના સંકેતો મળી રહ્યા છે. હવામાન વિભાગના જણાવ્યા મુજબ, આગામી કેટલાક દિવસો દરમિયાન ગુજરાતના વિવિધ ભાગોમાં ગાજવીજ અને તેજ પવન સાથે વરસાદી માહોલ સર્જાઈ શકે છે, જેનાથી લોકોને ગરમીમાંથી રાહત મળશે.

સવારના સમયે વાદળછાયું વાતાવરણ અને ભેજ

દેશના ઉત્તર-પશ્ચિમ અને મધ્ય ભાગોમાં ગરમીનું જોર ઘટતાં તેની અસર ગુજરાત પર પણ જોવા મળી રહી છે. રાજ્યના ઘણા વિસ્તારોમાં સવારે વાદળછાયું વાતાવરણ રહે છે, જોકે બપોરે ગરમ પવનો ફૂંકાય છે. વાતાવરણમાં ભેજનું પ્રમાણ વધવાને કારણે હવે વરસાદી સિસ્ટમ સક્રિય થવાની પૂરેપૂરી શક્યતા છે.

30 મે નાં રોજ  ઉત્તર અને પૂર્વ ગુજરાતમાં વરસાદની શક્યતા

આજથી જ રાજ્યના વિવિધ જિલ્લાઓમાં વરસાદની શરૂઆત થઈ શકે છે. ઉત્તર ગુજરાતના બનાસકાંઠા, મહેસાણા, સાબરકાંઠા, અરવલ્લી તથા પૂર્વ ગુજરાતના પંચમહાલ, દાહોદ, મહીસાગર અને છોટાઉદેપુર જિલ્લામાં ગાજવીજ સાથે હળવોથી મધ્યમ વરસાદ પડી શકે છે. આ સિવાય ગીર સોમનાથ, દીવ, દમણ અને દાદરા નગર હવેલીમાં પણ હળવા ઝાપટાં પડી શકે છે.

31 મેના રોજ વાવાઝોડા સાથે વરસાદની આગાહી

31 મેના દિવસે ઉત્તર ગુજરાતમાં વરસાદની સ્થિતિ વધુ મજબૂત બનશે. આ સાથે જ દક્ષિણ ગુજરાત અને સૌરાષ્ટ્રના વિસ્તારોમાં પણ હવામાન બદલાશે. આ સમયગાળા દરમિયાન ભારે પવન (૪૦ થી ૫૦ કિમી/કલાકની ઝડપે) ફૂંકાવાની અને વીજળીના કડાકા-ભડાકા સાથે વરસાદ પડવાની સંભાવના છે.

1 જૂનના રોજ અમદાવાદ-ગાંધીનગર સહિત વ્યાપક વરસાદની સંભાવના

1 જૂનના રોજ ઉત્તર અને મધ્ય ગુજરાતના મોટાભાગના વિસ્તારો જેવા કે અમદાવાદ, ગાંધીનગર, પાટણ, મહેસાણા, બનાસકાંઠા, સાબરકાંઠા, અરવલ્લી, ખેડા, આણંદ, પંચમહાલ, દાહોદ અને મહીસાગરમાં વ્યાપક વરસાદની આગાહી છે. જ્યારે સૌરાષ્ટ્ર-કચ્છ અને દક્ષિણ ગુજરાતના ભાગોમાં છૂટોછવાયો વરસાદ ચાલુ રહેશે. હવામાન નિષ્ણાતોએ વરસાદ અને તેજ પવનને જોતાં લોકોને સાવચેત રહેવા સલાહ આપી છે