કલોલમાં રહસ્યમય રીતે બે મકાનોમાં બ્લાસ્ટ, 1નું મોત
ગુજરાત કલોલમાં સ્થિત પંચવટી સોસાયટીમાં મંગળવારે સવારે રહસ્યમય બ્લાસ્ટના કારણે બે મકાનો ધરાશાયી થઇ ગયા. જેમાં એક વ્યક્તિનું મોત થયું છે. જ્યારે બે લોકો ગંભીર રીતે ઘાયલ થયા છે. હાલ બંનેને હોસ્પિટલમાં ભરતી કરાવવામાં આવ્યા છે.
ઘટનાની જાણ થતાં ફાયર બ્રિગેડની ટીમ સાથે પોલીસનો કાફલો પહોંચી ગયો છે. પોલીસની પ્રાથમિક તપાસ અનુસાર ગેસની પાઇપ લાઇનમાં બ્લાસ્ટ થયો છે. જોકે હજુ સત્તાવાર રીતે તેની પુષ્ટિ થઇ નથી. ઓનએનજીસીના અધિકારી પણ ઘટનાસ્થળે પહોંચી ગયા છે. ઘટનાને લીધે વિસ્તારમાં ડરનો માહોલ છવાય ગયો છે.
પોલીસે જણાવ્યું કે બ્લાસ્ટના કારણે બે મકાન ધરાશાયી થઇ ગયા છે. તેમાં એક વ્યક્તિનું મોત થયું, જ્યારે બે વ્યક્તિની હાલત નાજુક છે. બ્લાસ્ટના કારણે ઘણા મકાનોને નુકસાન થયું હોવાના પણ અહેવાલ મળ્યા છે. હાલ સ્થિતિ કાબૂમાં છે. ફાયર બ્રિગેડ સહિત અધિકારીઓનો કાફલો ઘટનાસ્થળે છે. બપોર પછી સત્તાવાર બ્લાસ્ટના સાચા કારણો વિશે ખબર પડી જશે.
