કોરોના વાયરસને લઈને ગુજરાત સરકાર સચેત, ખાનગી હોસ્પિટલોને પણ કોરોના વોર્ડ ઉભા કરવાનો આદેશ

કોરોના વાઈરસના પગલે રાજકોટ જિલ્લા દ્વારા એકસન પ્લાન કરવામાં આવ્યો છે. ઘાતક રોગચાળો વકરે નહીં તે માટે અલગ અલગ વિભાગને જવાબદારી સોંપવામાં આવી છે. સાથોસાથ ખાનગી હોસ્પિટલમાં કોરોના વોર્ડ શરુ કરવા સુચના આપવામાં આવી છે. તેમ જિલ્લા કલેકટર રૈમ્યા મોહને પત્રકાર સાથેની વાતચીતમાં જણાવ્યું છે.

ભારતમાં કોરોના વાયરસનાં દર્દીઓમાં વધારો થતાં ગુજરાતમાં સરકાર સતર્ક થઈ ગઈ છે. તેવામાં અમદાવાદ અને સુરતમાં કોરોના વાયરસના શંકાસ્પદ કેસ પણ મળી આવ્યા છે. કોરોના વાયરસને લઈ ગુજરાત સરકાર સતર્ક થઈ ગઈ છે. ગુજરાતના મુખ્ય સચિવે વીડિયો કોન્ફરન્સ દ્વારા જિલ્લાના તમામ કલેક્ટરોને સાવચેતીના પગલાં ભરવા માટે આદેશ કર્યા હતા. તેને અનુલક્ષીને કલેકટર દ્વારા તમામ તૈયારીઓ હાથધરી છે. સીવિલ હોસ્પિટલમાં આઈસોલેશન વોર્ડ કાર્યરત છે.

ભૂતકાળમાં સ્વાઈન ફ્લૂ વખતે પ્રાઈવેટ હોસ્પિટલોમાં સ્થિતિ વણસ્યા પછી સારવાર માટે સરકારી હોસ્પિટલોમાં રિફર કરવામા આવે ત્યારે ઘણું મોડી થયાના કિસ્સા બહાર આવ્યા હતા. આથી, કોરોના વાઈરસના શંકાસ્પદ લક્ષણો ધરાવતા નાગરીકોએ સરકારી હોસ્પિટલોમાં સારવાર લેવા અમારો આગ્રહ છે.

રાજ્યની સરકારી હોસ્પિટલોમાં ૨૪,૫૫૫ PPI કિટ, ૩૯,૦૪૧ N-૯૫ માસ્ક, ૮,૯૨,૩૦૦ ટ્રિપલ માસ્ક અને ૨૧,૨૫,૬૦૦ ગ્લવ્ઝનો જથ્થો ઉપલબ્ધ છે. સરકારી હોસ્પિટલોમાં લોજીસ્ટિકની કોઈ કમી નથી. જો કે, સરકારે ૬૧ બેઠકો કરીને ૩૭૦૦થી વધુ પ્રાઈવેટ પ્રેક્ટિસ કરતા ડોક્ટરોને પણ કોરોના વાઈરસના ઉપચાર માટે તાલિમબધ્ધ કર્યા છે.  

કોરોના વાઈરસના ટેસ્ટિંગ માટે અમદાવાદમાં બી.જે.મેડિકલ કોલેજમાં લેબ કાર્યરત છે. જામનગરમાં એમ.પી. શાહ મેડિકલ કોલેજમાં લેબની મંજૂરી મળી છે અને સુરત, રાજકોટ અને વડોદરામાં પણ ટેસ્ટિંગ માટે ભારત સરકારને દરખાસ્ત મોકલવામાં આવી છે.

આગમચેતીના ભાગરૂપે રાજ્યની સરકારી હોસ્પિટલોમાં ૫૭૬ આઈસોલેશન બેડ અને ૨૦૪ વેન્ટિલેટર તૈયાર છે. અચાનક જ પ્રાઈવેટ હોસ્પિટલોમાં આઈસોલેશન વોર્ડ તૈયાર કરવાની સુચના કેમ અપાઇ એવા પ્રશ્નના જવાબમાં અગ્રસચિવ ડો. રવિએ કહ્યુ કે, ભારત સરકારે સુચના આપતા નિર્ણય કર્યો છે. વિદેશથી આવતા અને બિન નિવાસી ગુજરાતીઓ મહદઅંશે ખાનગી હોસ્પિટલોમાં સારવાર લે છે.