રક્ષાબંધન માટે ઘરે બનાવો ક્રીમી કેસર પિસ્તા મિલ્ક કેક, સ્વાદ એવો કે સૌ વખાણ કરશે

રક્ષાબંધનના ખાસ પ્રસંગે જો તમે ઘરે જ કંઈક સ્પેશિયલ મીઠાઈ બનાવવા માંગતા હોવ તો ક્રીમી કેસર પિસ્તા મિલ્ક કેક એકદમ પરફેક્ટ વિકલ્પ છે. દૂધ, મિલ્ક પાવડર, કેસર અને પિસ્તાના સ્વાદથી ભરપૂર આ મિલ્ક કેક નરમ અને ક્રીમી બને છે. ચાલો જાણીએ સરળ રેસિપી.

 સામગ્રી

ફુલ ક્રીમ દૂધ – 1 લિટર

મિલ્ક પાવડર – ½ કપ

ખાંડ – ½ કપ

ઘી – 2 ચમચી

કેસર – 10-12 તાંતણા

ગરમ દૂધ – 2 ચમચી

પિસ્તા – 3 ચમચી, ઝીણા સમારેલા

એલચી પાવડર – ½ ચમચી

બદામ – 2 ચમચી, ઝીણા સમારેલા

ગુલાબજળ – 1 ચમચી

બનાવવાની રીત

1. સૌપ્રથમ કેસરના તાંતણાને 2 ચમચી ગરમ દૂધમાં 10 મિનિટ પલાળી રાખો.

2. એક જાડા તળિયાવાળા પેનમાં 1 લિટર દૂધ ગરમ કરો. તેને મધ્યમ તાપે ઉકાળતા રહો અને વચ્ચે-વચ્ચે હલાવતા રહો, જેથી દૂધ નીચે ચોંટે નહીં.

3. દૂધ થોડું ઘટી જાય પછી તેમાં મિલ્ક પાવડર ઉમેરો અને સતત હલાવતા રહો. ગાંઠ ન પડે તેનું ધ્યાન રાખો.

4. હવે તેમાં કેસરવાળું દૂધ અને ખાંડ ઉમેરો. મિશ્રણને ધીમા તાપે સતત હલાવતા રહો.

5. જ્યારે મિશ્રણ ઘટ્ટ થવા લાગે ત્યારે તેમાં પિસ્તા, બદામ અને એલચી પાવડર ઉમેરો. છેલ્લે ગુલાબજળ નાખીને બરાબર મિક્સ કરો.

6. એક થાળીમાં અથવા ચોરસ મોલ્ડમાં થોડું ઘી લગાવી લો. તૈયાર મિશ્રણ તેમાં પાથરીને ઉપરથી પિસ્તાની કતરણ નાખો. તેને રૂમ ટેમ્પરેચર પર ઠંડુ થવા દો અને ત્યારબાદ 2-3 કલાક માટે ફ્રિજમાં મૂકો.

7. મિલ્ક કેક સેટ થઈ જાય પછી તેને મનપસંદ આકારમાં કાપો અને ઉપરથી થોડા પિસ્તા-બદામથી ગાર્નિશ કરીને સર્વ કરો.